إي …. أنا أحب نفسي و أتقبلها

أوقف جدام المنظرة و قول : “أنا أحب نفسي و أتقبلها مثل ما اهيا”

شنو أول شي يطري على بالك بعدها ؟؟

اول خطوة عشان اعالج نفسي من كل شي فيها هو اني اتقبلها … و اتقبلها بكل حالتها، اتقبل نفسي وانا هادي وانا معصب .. اتقبل نفسي لما اصير ساعات بايخ او لما يكون دمي خفيف … احب نفسي لما يكون ويهي صافي و مرتاح او تعبان أو كله نفر … اتقبل نفسي بكل حالاتها … اتقبل نفسي واخطائي بالماضي لأن لوما اللي مريت فيه ماتعلمت و لا وصلت الى اليوم … اول شي انت، نفسك، إذا حبيتها حب غير مشروط … راح تحب الدنيا و الناس …

كان هذا حديثي مع الأستاذ محمد شريف قبل يومين …

قالي : “مو جنه هالحجي مثالي وايد !!!”.

قلت: لا !! كل شي خطوه خطوه …

مثل ما تعلمنا كل شي يوم احنا اطفال خطوه خطوه … محتاجين الحين نعلم نفسنا خطوه خطوه … يوم التزم ويوم أضعف ! عادي المهم أرجع و أكمل،  و أساس البلاوي و عدم الثقه في مجموعة كبيره من الناس اهوا انهم مو متقبلين نفسهم بالتحديد مو متقبلين جزء من شكلهم، عشان جذي حرصت إن توكيدات رمضان تكون متعلقه بالجسم، و أوضح الامراض النفسيه المتعلقه فيها.

منو يشفط بطنه اذا مشى ؟؟ كله خايف لا الناس تشوف بطنه !!! هذا اقرب مثال اشوفه دايم بالنساء و الرجال … تبيها تروح ؟؟؟ عادي اعترف فيها !! امش و انت مرتاح، لا تخاف الناس تطالعك … لأن الناس ما تدري عنك اصلا! … تقبلها، حبها، وبعد ما تحبها من نفسك راح تعرف شلون تتخلص منها !